Kontrata sa MCIA ngadto's security agency gikuwestiyon

Gikwestyon sa dakong opisyal sa usa ka security agency ang paghatag sa kontrata sa kadagkuan sa tugpahanan sa Mactan ngadto sa ahensya alang sa serbisyo sa 95 ka guwardiya diin may kalambigitan ang maong opisyal niini.

Si Lester Anthony Mendoza, presidente sa Baisa Security Investigation and Security Agency Incorporated mipalanog niini human si General Manager Adelberto Yap sa Mactan Cebu International Airport mipahibawo nga ang Philippine Aviation Security Service Corporation kon PASSCOR maoy nakadaog sa gihimong subasta.

Moabot ngadto sa P12 milyones nga kontrata matag tuig ang nakuha sa PASSCOR kabahin sa pagdestino og 95 ka mga guwardiya sa tugpahanan sa Mactan.

Matud pa ni Mendoza nga nasorpresa sila sa pamahayag nga giluwatan ni Yap nga namantala sa lokal nga mantalaan nga nagpahibawo nga ang PASSCOR mao na ang nakadaog sa subasta.

Gipasabot ni Mendoza nga aduna silay giduso nga awhag sa mga miyembro sa Bids and Awards Committee nga adunay pagsubli sa paghimog pakisusi sa ilang kapabilidad pagdestino og mga guwardiya sa tugpahanan sa Mactan.

Kini ang mga miyembro sa komitiba miingon nga sila wala makapasar sa gihimong pakisusi sa mga gikinahanglan aron sila tahasan sa pagdestino og mga guwardiya sa tugpahanan.

Gitataw ni Mendoza nga samtang wala pa maresolbar ang ilang giduso nga awhag angayan gayud unta nga dili kini ihatag sa PASSCOR.

"The evaluation procedure conducted by the BAC on eligibility, technical and financial requirements submitted by BAISA was flawed since we have fully complied with all of them," dugang pamahayag ni Mendoza.

Gikutlo sa mga opisyal sa BAISA ang pamahayag ni Yap nga nag-ingon nga sila misumiter sa usa ka "surprisingly low quotation,".

Apan bisan pa man niini gisalikway ang ilang kompaniya sa mga miyembro sa BAC.

Gikwestyon usab nila ang pamahayag ni Yap nga nagdayeg sa PASSCOR og ingon man maayong serbisyo niini ilabi na kabahin sa aviation security gumikan kay siya usa man usab sa opisyal niini.

Si Yap maoy giila nga chairman sa board sa PASSCOR sa mga papeles nga gikan sa Securities and Exchange Commission.

" PASSCOR security guards are not ordinary guards. They can be assigned anywhere in the airport's restricted areas," pamahayag ni Yap.

Gipasabot ni Yap sa pamahayag niini sa lokal nga mantalaan nga ang tugpahanan sa Mactan usa ka premiere nga tugpahanan og dili sila makahatag sa kontrata niini sa 95 ka guwardya ngadto sa BAISA gumikan kay misumiter sila sa ubos nga presyo