Restobar gisirad-an

Gipasirad-an ni Mayor Tomas Osmeña ang Restobar nga nahimutang diha sa Cebu Trade and Civic Center sa barangay Lahug ning dakbayan.

Ang Yo Latino of Cebu Incorporated nga gipanag-iya ni Emmarie Dizon gisirad-an kagahapon sa hapon sa mga tinugyanan sa Revenue Task Force pinangulohan ni Cristopher Ong human giluwatan ni Osmeña ang closure order pinirmahan niadtong petsa 21 ning bulana.

Kini tungod sa napakyas og renew sa business ug mayor's permit sa maong establisamento human ma-expire ang permit niini niadtong petsa 19 sa Agosto niadtong tuig 2003 og kapakyas ug lukat sa sanitary permit.

Nabutang sab sa maong kamanduan nga wala moasikaso sa maong obligasyon ang nanag-iya sa maong establisamento bisan pa sa pipila ka mga notisya nga gipadala sa siyudad ngadto sa management niini.

Hinuon gipadayag sa management sa Yo Latino dihang gitawagan sa Banat News nga moduso sila og motion for reconsideration ug mipasalig nga mobayad sa ilang obligasiyon ug mosunod sa tanang mga rekisitos sa dakbayan sa Sugbo.

Lakip sa gisirad-an kagahapon mao ang duha ka sangang buhatan sa Asle Resto Bar nga nahimutang sa The Village, Lahug Cebu City ug sa St. Patricks Square R. Aboitiz ning dakbayan.

Ang maong duha ka resto bar nga gipanag-iya sa usa ka Elsa Rodriquez gimando nga pasirad-an sa siyudad gumikan sa kapakyas niini og lukat ug business ingon man mayors permit sa pag-operate sa nahisgutang patigayun.