Kasumaran sa martial law gisaulog pinaagi's protesta

Atol sa ika-33 nga kasaulogan nga anibersaryo sa Martial Law kagahapon naghugpong ang grupo sa Labor Power Council (LPC) diin nagpahigayon sila og rally pagpadayag sa ilang pagsupak sa kagamhanan ni presidente Gloria Macapagal -Arroyo ug pagsupak sa pagpatuman sa extended value added tax (E-VAT).

Ang LPC gilangkuban kini sa 35 ka unyon, 40 ka urban poor organization, vendors, grupo sa mga drivers, kabatan-onan ug kababayen-an.

Mipahigayon og gisi og tax declaration ang maong grupo simbolo sa ilang pagsupak sa pagpatuman sa e-VAT.

Si Evangeline Abejo Secretary General sa LPC nagkanayon nga misuporta sila sa pagpahawa ni Arroyo sa iyang puwesto.

Lakip na ang mga naglingkod sa Senado ug Kongreso gusto usab nila nga mohawa sa pwesto. Panawagan usab nila ang pagtukod og usa ka transitional revolutionary government.

Si Pete Negara spokesperson sa Atomic ug vice chairman sa LPC nagkanayon nga ang kahimtang sa nasud karon pareha lang gihapon sa Martial Law tungod kay padayon gihapon karon ang mga harassment sa mga piket line, demolisyon sa mga squaters ug vendors lakip na ang pag-pick up sa mga lider sa mga militante.

Dul-an sa 200 ka miyembro sa nahisgutang militanteng grupo ang miuban sa rally.