Mga komentarista gisaway

Kadaghanan sa giihaw ug gipatay nga mga komentarista sa radyo way kabangkagan bahin sa doktrina sa panibya, matud pa ni Edward Abad, Presidente sa Kapisanan ng mga Brodkaster sa Pilipinas (KBP) Cebu Chapter.

Maoy hinungdan nga giawhag ni Abad ang mga tagdumala sa radyo nga kinahanglang edukahon nila pag-ayo bahin sa hustong paagi sa pagpanibya ug pangomentaryo ang ilang mga komentarista aron dili kini masugamak sa kaalautan.

Atol sa tigom bahin sa 'Radio Commentators in the Line of Fire" gipasabot ni Abad nga kadaghanang komentarista, basta naa na sa atubangan sa maykropono maorag sila nay hari nga dili na maluoy, sa dungog sa mga tawong ilang komentaryohan ug atakehon nga wala na maglantaw sa ilang kaugalingon nga masayop usab sila kay wala may tawong perpekto.

Labaw sa tanan, matud pa ni Abad nga tungod lang sa maykropono ang mga way hibangkaagan ug kuwang sa pangutok nga mga komentarista nagtuo na sila nga makapanalipod na sa ilang kinabuhi ang kaisog sa ilang tingog sa kahanginan.

Diha sila masayop kay ang mga tawong maglagot, sad-an man siya ug dili, wala kini mahadlok sa isog nga tingog sa usa ka komentarista, matud pa ni Abad.

Napanid-an usab si Abad nga daghan kaayong isog nga komentarista nga isog lang sa pangomentaryo apan kon sa akto nang kaatubang nila ang ilang kontra, mobahag usab ang ilang ikog.

Matud pa ni Abad nga 80 porsiyento kon himabaw sa napulo ka gipamatay nga mga peryodista way mga background bahin sa "journalism".

Maoy hinungdan nga higpit niyang giawhag ang mga tagdumala sa radyo nga higpitan usab nila ang pagbansay sa ilang mga komentarista aron nga dili kini maghatag og kadaot sa dungog sa taga media ug makatabang hinuon sa pagpatunhay sa malinawong pagsabwag og kredibleng mga kasayoran ngadto sa katawhan.

Ang Press Freedom Week nga kasaulogan karong tuiga gipangunahan sa The FREEMAN.