Coastal road buksan tungod sa pista sa Pardo

Ablihan karong adlawa ang coastal road sa South Reclamation Project (SRP) ngadto sa tanang mga motorista sugod karong buntag hangtud sa alas 12:00 sa tungang gabii.

Kini maoy gipahibalo ni Mayor Tomas Osmeña atol sa press conference niini kagahapon human gi-aprobahan niini ang request gikan ni City Administrator Bimbo Fernandez aron pagsulbad sa suliran sa trapiko gumikan sa tinuig nga kapistahan sa Pardo.

Apan pagkasunod adlaw subli kining pasirad-an og balik ug kadto lang mga sakyanan nga dunay mga SRP pass ug kadtong mga sakyanan sa gobyerno ang tugotang maka-agi sa South Coastal Road.

Samtang gisalikway usab ni Osmeña ang hangyo sa arsobispo sa Sugbo Ricardo Cardinal Vidal nga hatagan ug patas nga kahigayonan ang mga Sugboanon nga makaagi sa maong reclamation project.

Apan pabiling bukas ang mayor paghatag og higayun nga makaagi sa SRP ang Cardinal apan dili sab niya kini panumbalingon kun dili usab mo-agi ang Cardinal sa maong lugar.

Apan subling gibarugan sa mayor nga wala niya hikawi ang mga Sugboanon pag-agi sa maong lugar gumikan kay bugtong nilang gihimo mao lang ang pag-regulate sa maong lugar aron masiguro usab ang maong proyekto nga gigahinan ug binilyon ka pesos sa dakbayan.

Hinuon gipasabot sa mayor nga automatic nga makakuha ang mga molupyo dinhi sa dakbayan kun itandi sa mga molupyo gikan sa lainlaing siyudad ug kalungsoran sa Sugbo gumikan kay ang mga molupyo sa dakbayan mao man ang nanag-iya sa maong proyekto.