Naghikog sulod sa kasilyas

Lain na usab nga insidente sa paghikog ang nahitabo diin sa labing ulahing biktima mao ang usa ka kanhi kawani sa usa ka inilang kompaniya sa softdrink kinsa naghikog sulod sa ilang kasilyas niadtong nakalabay'ng adlaw.

Giila ang biktima nga mao si Lorenzo Magallano,40, minyo ug molupyo sa dalan Burgos sa barangay Alang-alang dakbayan sa Mandaue.

Ang biktima migamit og usa ka pisi nga nylon nga gihikot niya sa sagunting sa kasilyas ug diha sa iyang liog. Nagbitay na kini dihang nakaplagan sa iyang asawa.

Sumala pa sa kapolisan problema sa kuwarta ang hinungdan sa paghikog niini base usab sa gikatahong nakuhang suicide note diha sa crime scene.

Niadtong nakalabay'ng semana dili momenus tulo ka tawo ang naghikog gumikan usab sa mga problema nga wala na maagwanta og dala sa mga biktima.

Usa ka imbestigador sa Homicide Section nga si PO3 Roberto Escarlan dinhi sa Sugbo ang mitug-an nga kasagaran sa mga kasong susama sa paghikog mahitabo gyud ning mga bulan sa Hulyo hangtud sa Septiyembre.

Wala pa hinuon sila makahatag og konkretong rason o di ba kaha pagtuon nganong kining mga bulana maoy daghang mga susamang kaso.