PNP alerto sa SEAGames

Kapolisan sa lalawigan andam na sa pagpahigayon sa South East Asian Games dinhi sa Sugbo alang sa seguridad sa gibana-banang 7siete mil ka mga delegadong langyaw nga mangabot dinhi.

Sumala pa ni Acting Cebu City Police Director Melvin Gayotin sa pakighinabi sa Banat News nga tanang mga dapit nga dunay event pabutangan na og mga polis lakip na ang mga hotel nga maoy pahuwayan sa mga delegado.

Samtang gitukod usab sa Police Regional Office 7 ang "Task Force SEA Games Pito" nga maoy over-all nga modumala sa security sa usa ka semanang kalihukan sa dakbayan.Si Sr. Supt. Lani-O Nerez maoy gitahasang ground commander sa maong task group.

Ang mga dapit nga pahugtan ang seguridad mao ang University of San Carlos Main campus, ug Cebu Colliseum sa dalan Sanciangko ingon man ang mga hotels.

Hinuon si Gayotin nagkanayon nga wala na kinahanglana ang augmentation gikan sa PRO7 sanglit duna namay gitaganang mga polis gikan sa mga police stations nga maoy pabantayon lakip na ang Crowd Dispersal Management (CDM) isip reserbang polis.

Gawas pa niana, ang PRO7 sumala pa ni Gayotin mopakatap man usab sa ilang mga sakop sa palibot.

Ang SEAGames duna 53 ka mga paugnat sa kusog nga ipahigayon 41 ka mga dapit dinhi sa Pilipinas, kini naglangkub sa Metro Manila, mga rehiyon 3, rehiyon 4, rehiyon 6 ug dinhi sa rehiyon 7.