'Ipagawas ang tinuod'

Mga sakop sa media giawhag ni Cebu nga Archbishop Ricardo Cardinal Vidal mopagawas kun unsay tinuod nga gikinahanglan karong panahuna ilabi na sa mga kabus nga daw gidan-ok na lang sa daplin sa katilingban.

Kini maoy mensahe sa prelate sa pagsaulog niini sa santos nga misa atol sa selebrasyon sa ika-11 ka tuig nga kagawasan sa mga sakop sa media dinhi sa Sugbo.

Sa iyang mensahe, iyang gidasig ang media sa pagkuykoy sa kamatuoran aron hikit-an ang ugat nga nakaingon sa kahimtang karon sa mga sektor nga gihinganlan og "the marginalized."

"As Cebu Press, men and women you have a lesson to learn and live by. When you feel free to search for truth share it with those who need it most. Give it freely to the needy, kay kinsa man gud diay ang nagkinahanglan nga sultihan sa tinuod mahitungod sa ilang kahimtang? Kinsa man gyud ang unahon nato ug mahatagan sa kamatuuran? Agig tubag, daghan sila, sila nga gigutom, giuhaw, hubo, dumuduong, nagmasakiton, gipriso, sila nga sa pagkakaron ginganlan og "The Marginalized," sumala pa sa arsobispo agig pamalandong sa ebanghelyo kagahapon.

Siya mapahiubsanong mipahibalo nga ang Septembre 18 nga mao usab ang pagsugod sa usa ka semanang tinuig nga selebrasyon sa Cebu Press Freedom mao usab ang adlaw nga natudlo siyang ikatulong Arsobispo sa Sugbo 23 na ka tuig ang nakalabay.

Gitapos ni Vidal ang misa sa pag-abiba sa kagawasan sa mga sakop sa media nga diin sa sayo pa iyang gidayeg gumikan sa natampo sa maong sektor sa katilingban ug sa Diyos