Negosyanteng Hapon, asawa gipasalamatan sa Kapitolyo

Gipasalamatan sa mga opisyal sa probinsiya sa Sugbo ang usa ka negosyante nga Hapon lakip na sa kapikas niini nga usa ka Sugbuanon gumikan sa paningkamot niini nga adunay madonar nga sakyanan sa kabomberohan ug ambulansya gikan sa nasud sa Japan.

Si Gobernador Gwen Garcia, Bise Gobernador Gregorio Sanchez ingon man si Bokal Victor Maambong mipaabot sa ilang pasalamat ngadto sa magpapatigayon nga Hapon nga si Takao Akiyama ingon man sa kapikas niini nga si Karen Lei Tabelin.

Laing gipasalamatan nila ni Garcia, Sanchez ug Maambong mao ang laing negosyante nga Hapon nga si Kato Yasutoshi, usa sa kauban ni Akiyama.

Pinaagi sa paningkamot sa managtiayon nga Akiyama sila si Garcia, Sanchez ug Maambong uban usab nila ni Sam Costanilla ug Manlalaban Luisito "Louie" Arma miadto gayod sa Tokyo, Japan aron pagtan-aw sa firetruck ingon man sa ambulansya.

Si Gobernador Garcia miingon nga pinaagi sa paningkamot sa managtiayon nga Akiyama makuhaan na unya ang problema sa probinsya ilabi na gayud sa mga lungsod nga wala gayud iyang kaugalingon nga firetruck ug ambulansya nga magamit kon adunay dagkung mga hitabo.

Ang pamahayag sa gobernador gidasunan usab ni Bise Gobernador Sanchez nga nakakita usab sa dakung tabang unya sa maong donasyon.

"Daku gayod kaayo nga tabang ngadto sa kalungsoran nga walay kaugalingon nga firetruck kun maabot na kining maong donasyon og magpasalamat kita og daku sa managtiayon nga Akiyama," pamahayag ni Sanchez.

Si Sanchez mitataw hinuon nga ang maong mga sakyanan pulos kini right hand drive kon RHD apan mangita sila og pamaagi niini nga ma-convert kini ngadto sa LHD.