Ang nasamdan ug nadala sa tambalanan giilang si Bernadia Cabañes,68, minyo ug molupyo sa Sitio Dumapo sa naasoy'ng lugar human girakrakan ang ilang balay ginamit ang mga tag-as nga kalibre sa armas.
Samtang gitumbok nga suspek mao ang ilang konsehal nga si Romulo Estenzo uban sa duha ka wala mailhing mga tawo nga nagsuot og bonnet sa nawong.
Si PO1 Larry Ilustrisisimo nga maoy miimbestigar sa kaso mitug-an sa Banat News ang tuyo sa mga suspek mao ang anak ni Bernadia nga si Gemma Ruscual,38 kinsa diha magpunduhan sa balay sa nasamdan.
Sa sayo pa, si Ilustrisisimo nagkanayon nga unang giadto sa tulo ka mga lalaki nga pulos nagbonnet ang balay sa usa pa ka anak ni Bernardia nga si Marciano Cabañez ug giingong gipangtiunan sila og armas ug gipangita si Gemma kun hain kini magpuyo.
Mihimakak unta ang banay apan usa sa mga pag-umangkon nila ang giingong nadailos ang dila ug nakatug-an nga didto nagpuyo ang iyang iyaan nga si Gemma sa balay sa ilang apuhan.
Mibiya ang mga suspek ug giadto sa Sitio Dumapo ang biktima, matud pa ni Ilustrisisimo nga pinasingka pang misangpit ang konsehal didto sa balay ni Bernardia aron mangayo og tubig.
Sa pagduda ni Gemma gilili una niya ang bangag sa bungbong ug gikatahong iyang nalilian si konsehal Estenzo nga nanagkot og lighter,gawas pa niana gikatahong hayag ang bulan niadtong tungura.
Diha-diha kalit nga mipaka ang nagsunod nga buto sa armas ug naigo ang biktimang si Bernardia sa palad ug sampot, dali usab nga nangikyas ang mga suspek samtang gidala sa tambalanan ang biktima.
Nakuha sa crime scene mao ang basiyo sa kalibre .30 nga bala, kalibre 45 ug lighter ingon man slug, sumala pa ni Ilustrisisimo ila nang gisubay ang motibo sa pagpamusil sanglit si Gemma gikatahong dunay kasong gisang-at batok sa maong konsehal kaniadto.