Tomas kumbinsihon aron mga priso ibalhin sa hingpit

Kumbinsihon sa oversight committee sa Bagong Buhay Rehabilitation Center (BBRC) nga mosugot si Mayor Tomas Osmeña nga mahinayun ang gilaraw nga anam-anam nga pagpabalhin sa mga naghuot nga piniriso diha sa maong bilanggo-an ngadto na sa bag-ong Kalunasan Jail.

Gibutyag ni Atty. Gregorio Bacolod, tsirman sa oversight committee nga dako ang iyang pagtuo nga mosugot ra ning maong laraw si Osmeña ilabi na kun ila na unya kini nga mapasabot kabahin sa tuyo ug tumong niini.

Nasayran nga una nang gipadayag sa mayor nga dili mosugot nga dunay mahitabong pagbalhin sa mga piniriso sa karaang BBRC ngadto na sa bag-ong Kalunasan jail hangtud nga dili niya masiguro nga dunay reporma sa organisasyon sa Bureau of Jail Management and Penology (BJMP) nga maoy nagdumala sa maong bilanggoan.

Gitumbok sa mayor nga palimpyohan una niya ang maong bilanggoan gikan sa mga anomaliya ug korupsiyon sama sa padayong pagkunsabo sa mga piniriso ug jail personnel sama sa pagpayuhot ug gidiling drugas, sugal, babaye ug inom diha sa maong bilanggoan, una siya mosugat sa pagbalhin.

Nasayran nga 300 ka mga piniriso nga gagmay lang ug silot gitinguha nga unang ibalhin sa bag-ong bilanggoan aron maminus-minusan ang kahuot niini karon diha sa karaang BBRC.

Kini tungod kay sa labing uwahing report sa BBRC sa milabayng tigum sa Police Coordinating and Advisory Council kon PCAC mokabat na sa 2,369 ka mga piniriso bisan ug duna lay kapasidad ang maong bilanggo-an sa 250 ngadto sa 500 ka mga piniriso.