Mga residente mireklamo vs subdivision

Dul-an sa 60 ka residente sa barangay Lagtang, dakbayan sa Talisay misupak sa proyekto sa Santa Lucia diha sa ilang lugar.

Ang nahisgutang mga residente mipasangil nga ang maong proyekto maoy hinungdan sa pagdahili sa yuta nga nakaali sa access road sa ilang lugar.

Bag-o lang, si Celiapo Cabuenas ug ang mga residente sa Sityo Iba sa nahisgutang barangay miduso og petisyon pagpahunong sa proyekto sa Santa Lucia ngadto sa buhatan sa City Legal Officer ug ngadto sa City Planning and Development Council (CPDC) sa siyudad.

Si Cabuenas nagkanayon nga kinahanglan nga ang maong problema mahatagan dayon og pagtagad tungod kay nakahatag kini og kahasol sa mga residente sa lugar.

Matud pa ni Cabuenas, gipadayon gihapon sa Santa Lucia ang ilang gihimong proyekto bisan pa og gi-withhold ang permit niini ug wala usab kini hatagi og pagtugot sa ilang barangay.

Si Christine Homez, CPDC officer kinsa maoy miinspeksiyon sa proyekto nagkanayon nga sa iyang na- obserbahan nga ang dam nga nahimutang sa maong lugar moawas hinungdan nga mobaha ang ubos nga parti sa lugar.

Si Homez misumiter og report kabahin sa maong problema ngadto sa buhatan sa mayor sa siyudad sa milbay'ng adlaw.