Kini maoy tumong sa gipatawag nga duha ka adlaw nga Eucharistic Congress sa Arsobispo sa Sugbo Ricardo Cardinal Vidal nga himoon didto sa SM City karung petsa 3 ug 4 sa bulan sa Oktubre.
Gipaabot nga tambungan ang maong duha ka adlaw nga kalihukan sa mokapin sa usa ka gatus ka mga parokya dinhi sa tibuok Sugbo.
Gibutyag ni Elpedio Dela Victoria Jr., presidente sa Parish Pastoral Council (PPC) sa Saint Joseph the Worker Parish sa Tabunok, Talisay nga tumong niini sa simbahan nga palig-onon ang mga parokya aron mao kini magsilbing sumbonganan sa mga masinating problema sa komunidad.
Apil sa target nga paningkamutan sa simbahan nga mahatagan og pagtagad mao ang suliran sa nasinating kalisdanan, problema sa ilegal nga drugas ug ning pagkatap sa mga ilegal nga sugal.
Gani niadtong milabay'ng petsa 27 sa Agosto mipahigayon og Eucharistic Congress ang PPC sa Tabunok,Talisay nga gitambungan sa mokapin sa 500 ka mga opisyal sa lain laing simbahan ug kahugpungan.
Gibutyag ni dela Victoria nga mag-abot silang tanang mga PPC atol sa ipatawag nga Eucharistic Congress sa Cardinal karung sunod bulan aron usahon sa pagtuki ang mga nadawat niining reklamo gikan sa lainlaing mga parokya sa kalungsoran ug dakbayan sakop sa Sugbo.
Gibutyag ni dela Victoria nga wala magkuwang ang simbahan pagpahimangno sa publiko sa mga butang nga angay buhaton apan gihimo kini aron sa ingon mapaduol pa ang simbahan ngadto sa kasingkasing sa mga Sugboanon ug aron sa ingon dili magpanagana ang mga parokyano pagsumbong ug pagpangayo og panabang sa simbahan