Mga biktima ni Sgt. Josol lisud matabangan sa PCSO

Mga biktima sa nadasmagan sa sakop sa Presidential Security Group niadtong milabay'ng semana dili basta-basta matabangan sa Philippine Charity Sweepstakes Office base usab sa patakaran sa maong buhatan alang sa paghatag og mga hinabang sa mga nanginahanglan.

Si Narisa Dacillo ang Social worker sa PCSO nga gikahinabi sa Banat News nga dunay PCSO Board Resolution number 272 nga nagmandong gikinahanglan nga ang mga biktima sa mga "vehicular accidents" nga "hit-and run" apan walay matumbok nga suspek mao ray katagaan og hinabang pinansyal lakip na ang mga kasong "mediko legal" nga wala mailhi ang suspek.

Apan gikinahanglan nga ubanan kini og police report sa insidente nga nagtumbok nga wala gyud mailhi ang suspek. Lakip usab sa puwedeng matabangan sa PCSO mao ang mga biktima sa pagpamusil ug pagpanunggab nga wala mailhi ang mga responsible.

Sa kasong gikalambigitan ni Staff Richard Josol sakop sa PSG ug SPO1 Roque Rañola sa Regional Mobile Group sa PRO-7 nga escort ni Cebu Customs District Collector Maria Lourdes Mangaoang niadtong milabay'ng semana diha sa dalan F. Gonzales diin usa ka trak van ang una nilang naatrasan apan wala hinuon mohunong ug mipaturatoy palayo hangtod nakabangga og usa ka PUJ diin lima ka pasahero niini ang naangol.

Si Josol giingong gitaktak na sa PSG ug gipabalik na ngadto sa unit niini sa Philippine Marine Corps samtang giimbestigahan pa sa PRO7 si Rañola sumala pa sa mando ni Director General Eduardo Gador.

Ang duha nasikop sa kapolisan sa Waterfront Police Station ug giingong positibong nakainom base usab sa paghiling sa Cebu City Medical Center.

Giangkon ni Dacillo nga nakadawat na siya og suwat hangyo para hinabang pinansyal sa mga pasaherong nabiktima gikan sa buhatan ni Presidential Secretary for the Central Visayas Felix Guanzon apan matud niya wala kini kaaksyoni gumikan sa kakulang sa mga gikinahanglang kamatuoran sanglit wala gani matultoli kun hain na ang mga biktima sa pagkakaron.

Dugang pa ni Dacillo mag-agad ra unya sa mga detalye sa insidente ang basehan sa "assessment" sa PCSO kun hatagan ba og hinabang ang mga biktima.