Ekplorasyon sa Lana dinihi pabantayan

Gipabantay ang mga mananagat sa kalungsoran sa habagatan alang sa seismic survey nga ilusad karong buwana pagsukod kon may pundo bang asayte ang kadagatan sa maong mga lugar.

Matud pa ni Mayor Willy Caminero sa Argao nga ilang giawhag ang ilang mga mananagat nga panid-an ang mga payaw, bungsod, ug uban pang panagatan nga gipalagnas lang sa kadagatan aron nga dili madisturbo niining ipahigayong survey.

Ang maong pamahayag gihimo ni Caminero samtang mipahibawo na ang Alcorn Gold Resources, usa ka oil exploration nga kompaniya pinaagi sa Provincial Development Council sa Cebu nga magsugod na sila sa pagpaniid sa pulso sa kadagatan sa habagatan karong buwana.

Gawas sa Argao lakipon usab pagpaniid sa Alcorn ang kadagatan sa Dalaguete, Alcoy ug Boljoon.

Matud pa ni Caminero nga dako usab siyag pagtuo nga may deposito sa Lana ang kadagatan sa Argao tungod kay kabahin ra kini sa Tañon strait ang lugar nga nasuhid na niadtong miaging mga buwan.

Matud pa ni Caminero nga iyang gipahibawo daan ang iyang mga mananagat aron kalikayan ang sama sa nahitabo sa unang pagsurvey sa kadagatan sa Tañon diin daghang mga reklamo gikan sa mga mananagat sa apiktadong mga lungsod.

Kasagaran sa mga reklamo mao ang pagkawagtang sa ilang mga payaw, pagkagusbat sa mga bungsod, mga panggal ug uban pang kahimanan sa panagat.

Gani gisaway sa kagamhanan sa lalawigan ang taga Department of Energy DOE niadtong tungora gumikan sa kapakyas niini pagpahibawo sa mga lokal nga opisyal sa kagamhanan kalabot sa gihimong survey sa ilang kadagatan.

Hinuon ang tanan gipasabot na ni DOE-7 Regional Director Antonio Labios ang ilang bahin sa maong survey.