Kampanya vs. illegal gambling

Bohol - Nagpadayon karon ang kapolisan ning probinsya sa ilang hingusog nga kampanya batok sa bisan unsang matang sa ilegal nga sugal.

Gipatuman kini sa kapolisan nga kampanya agi'g sanong sa giluwatan nga kamanduan ni Gobernador Erico Aumentado.

Si Aumentado mimando ngadto sa kapolisan nga kinahanglan gayud nga himoon ang makanunayon nga paggukod niadtong mga tawo nga nalambigit sa ilegal nga sugal.

Giluwatan ang mando sa gobernador sa hingusog nga kampanya human usab makadawat ang iyang buhatan og reklamo kabahin niini.

Gitataw sa gobernador nga ang kapolisan mao gayud ang adunay igong katakos paggukod niadtong mga tawo nga nalambigit niini.