Si Aurora Econg, chairman sa Economic Enterprise, nagkanayon kagahapon nga tungod sa nasinating pagkaalkanse sa siyudad sa ihawan patas-an na ang kolekta sa bayad sa mga ihawon didto.
Matud pa ni Econg nga ang siyudad dili dayon makapataas karong bulana sa kolekta tungod kay kasagaran sa mga end-users wala pa ma-aware bisan og ang konseho naa nay gihimong public hearing.
Apan ang kagamhanan sa siyudad mipadala na og mga suwat ngadto sa mga vendors ug end-users para pagpahibawo sa bag-ong rate sa koleksyon sa ihawan.
Ang dakbayan naalkanse og P1,213,839.62 sulod sa upat ka buwan niining pag-operate.
Niadtong buwan sa Mayo niining tuiga giablihan ang ihawan diin matag buwan ang siyudad migasto og P755,243.33.
Ang maong salapi nga gigasto sa siyudad naglangkob sa personal services nga P83,862.33, maintenance and operating expenses nga P165,491.00, sweldohan sa mga job orders nga P375,000.00 ug galastohan sa gasolina nga P130,000.00.
Ang maong ihawan mikita lang kini og P1,807,133.70 sulod sa upat ka buwan.