Sa tulomanon Education in Action, sa DYMR Radyo ug Bayan Cebu, si Dr. Rosito Quimada, information officer sa Department of Education (DepEd-7) mibutyag nga midayeg sila pag-ayo sa mga tinugyanan sa edukasyon sa lalawigan sa Southern Leyte.
Matud pa ni Quimada nga nasayod kaayo sila niini ug namatud-an nila nga daghan kaayong mga katarungan nganong kanunay nga mag-una o number one ang mga estudyante sa maong lalawigan sa natad sa eksamen sa NAT matag tuig.
Usa niini mao ang panaghiusa sa mga magtutudlo ug sa mga ginikanan sa pag-atiman sa pagtudlo sa mga kabataan bahin sa leksyon sa eskuylahan.
Ang kawalay laing kalingawan sa mga kabataan ug sa katawhan sa maong lalawigan maoy ikaduhang hinungdan.
Ang ikatulo mao ang maayong pagkalambigit sa mga kadagkoan sa eskuylahan ug sa mga magtutudlo pagpatunhay sa maayong paagi sa pagpanudlo ngadto sa mga kabataan.
Miingon si Quimada nga dinhi sa Rehiyon 7 mahimo ra man unta kining makab-ot sa mga kabataan ang kahanas ug kabatid sa natad sa mga subject nga English, Science ug Mathematics.
Apan gumikan sa kadaghang mga kalingawan sama sa television, sine, internet, ug mga nagkalainlaing kalingawan sa sulod ug sa gawas sa panimalay maoy nakalawgaw niining tanan, midugang siya.
Naa pay kalisod sa panginabuhi nga ang mga ginikanan kawad-an na og panahon sa pagtabang pag-atiman sa pagtudlo sa ilang mga anak bahin sa mga leksyon niini.
Si Quimada nagkanayon nga gihimo na sa mga opisyal sa DepEd ang tanang paagi apan lisod gyud hiapsan ang taga So., Leyte sa natad sa ginukdanay sa maayong grado sa NAT.