Mao kini ang gibutyag sa mga opisyal sa Land Transportation Franchising and Regulatory Board (LTFRB-7) kinsa nakamatikod nga way ngipon ang mga hulga ni Mayor Tomas Osmeña nga tangtangan og prangkisa ang mga welgista.
Sa tulomanon "Government on Line" sa DYMR Radyo ng Bayan Cebu, gibutyag ni Rey Elnar, transport development officer sa LTFRB-7 nga wala sila makamatikod nga may mga operator sa mga public utility jeepneys (PUJ) nga gihuboan og prangkisa tungod kay miapil sa welga sa mga sakyanan.
Makaduha na ka higayong miwelga ang mga sakyanan dinhi sa dakbayan sa Sugbo diin sipa kaayo ang pasidaan ni Osmeña nga tangtangan sa prangkisa ang mga operator nga misalmot sa welga.
Apang matud pa ni Elnar nga wa kini matuman kay wala sila makadawat og kamandoan sa pagpasakmit sa mga prangkisa niadtong mga welgista.
May mga drayber nga wala magpaila atol sa maong tulomanon mipahibalo nga ang tanan pulos lamang pagpanghulga sa mayor busa dili na sila motuo kon manghulga ang mayor pag-usab kanila.
Karong Lunes (ugma) pamatud-an sa mga drayber ug operator sa mga PUJ nga dili sila mahadlok niining pagpanghadlok kanila sa mayor.
Kini tungod kay mosalmot sila sa dakong welga sa sakyanan nga ipahigayon sa tibuok nasud.
Sa bahin sa taga LTFRB, si Elnar nagkanayon nga mag-agad lamang sila sa mga kamandoan gikan kang LTFRB Regional Director Rogelio Osmeña.