Tom init gihapon sa Mandaue PUJs

Mibahad si Mayor Tomas Osmeña nga dili gyud siya mohunong pagpangita og paagi aron hingpit nang dili makalahos og biyahi ang tanang mga PUJ sa Mandaue nga rota sa uptown area ug Osmeña Boulevard ning dakbayan.

Plano na usab karun sa mayor nga ipa-amendar ang ordinansa sa siyudad ang City Ordinance 1837 nga nagtugot lang pag-load ug unload sa mga PUJ sa Mandaue sa mga accredited terminals sama sa Ayala ug SM.

Kini aron isukip diha sa maong ordinansa ang pagpa-impound sa yunit kun padayon kining molahos og pamasahero dinhi sa dakbayan.

Kini human masayran ni Osmeña nga gibalibaran sa Land Transportation Office (LTO-7) ang hangyo sa Citom nga mogamit ug Temporary Operator's Permit (TOP) aron maoy i-isyu sa mga drayber sa PUJ sa Mandaue nga madakpan tungod sa padayung paglapas sa maong ordinansa.

Kini maoy hinungdan nga hangtod karon nagpabilin gihapon nga duna pay mga yunit sa Mandaue nga rota sama sa 21B ug 22B sa Mandaue Jones nga rota ang padayong mamasahero dinhi sa dakbayan gumikan kay citation ticket lang ang i-isyu sa Citom ug pabayron lang sila ug multa niini.

Apan sa labing uwahing pakisusi ning tigbalita ngadto sa Citom niadtong milabay'ng semana kapin sa 600 ka drayber na ang napasakaan ug kaso sa piskaliya gumikan sa kalapasan sa ordinansa sa dakbayan.