Ulo gidakdakan og bato, napisat

Napisat ang ulo sa usa ka lalaki nga gituohang nalisuan na sa saktong pangisip dihang gidakdakan kini og bato sa usa ka basurero niadtong miaging adlaw sa mga alas 8 ang takna sa gabii dinha sa may General Maxilom Avenue ning siyudad.

Ang biktima nga wala mailhi gibanabana nga nagpangidad og 40-anyos, 5'5'' ang gitas-on, taas og buhok, dauton, nagsul-ob og sleeveless nga itom og short nga blue.

Sigun sa asoy ni SPO3 Alfredo Gaviola, niadtong gabhiona atol sa gihimong pagronda sa kapolisan sa Mabolo nga gipangunahan ni SPO2 Roleto Supatan, samtang milabay sila sa maong dalan naaktuhan nila nga nagkadugo na ang maong biktima ug wala na mahitsura ang dagway niini.

Apil sa naatlan sa maong insidente mao ang suspetsado nga si Charlie Alburo alyas Alex, 32 ug lumolupyo sa Cabreros, barangay Basak ning siyudad. Nasayran nga ang duha nag-ilog sa basura ug dihang nagmagahi paghatag ang biktima kalit kining gidakdakan og bato ni Alburo.

Ang biktima dali nga gidala sa Cebu City Medical Center apan patay na kining milandig didto samtang ang suspetsado anaa na karon sa kustodiya sa kapolisan sa Mabolo.