Gibuksan ang maong selebrasyon pinaagi sa usa ka santos nga misa sa alas 7:00 sa buntag nga gipasiugdahan ni Fr. Boy Alesna didto gyud mismo sa marker site ni Don Sergio Osmeña sa may dalan Lapu-Lapu corner Osmeña boulevard st.
Human sa santos nga misa gisunod dayun ang pagpahigayun sa hamubong programa nga gitambongan nila ni Mayor Tomas Osmeña, kapikas nga si Margot ug sa iyaan niini nga Rosie Osmeña nga anak ni Don Sergio Sr. ug sa mga sakop sa Osmeña clan.
Apil sa nitambong mao si Gobernador Gwendolyn Garcia, mga konsehal sa dakbayan sama nila ni Konsehal Procopio Fernandez, Edwin Jagmoc, Glena Bontuyan, Gerardo Carillo, Hilario Davide III, Eugenio Faelnar ug Bise mayor Michael Rama.
Mitambong sab sila si PRO-7 Director Eduardo Gador, CCPO acting chief Supt. Melvin Gayutin, City fire marshal Supt. Esmael Codilla ug kapulisan ug militar ug mga sakop sa nahabiling beterano sa milabay'ng ikaduhang gubat ug ang sakop sa Knights of Columbus.
Gipadayag ni Osmeña atol sa pagbatbat niini sa hamubong mensahe ang pagpasalamat sa tanang mga nanambong sa maong kalihukan ilabina gyud ni Garcia nga gihulagway niya nga maoy labing una nga babayeng gobernador sa Sugbo ning nahisgutang kalihukan.
Kini tungod kay matud sa mayor bisan ug ang iyang ig-agaw kaniadto nga si kanhi Gobernador Lito Osmeña wala gyud kini makatambong sa mga nanglabay'ng kalihukan.