Dalagita gikidnap, gi-rape

Human sa duha ka adlaw nga pagkidnap ug paglugos sa tulo ka wala mailhing mga tawo nakaikyas ug nakalingkawas ang 16 anyos nga biktima ug nakapangayo og tabang sa kapolisan.

Ang biktima kinsa usa ka katabang wala sa iyang kaugalingon gumikan sa giagiang kasinatian, nakakita og usa ka tiguwang nga babayeng vendor diha sa dalan Pelaez ug maoy iyang gipangayuan og tabang aron siya magpahatod sa iyang agalon diha sa Sitio Lomboy, Banawa-Guadalupe ning dakbayan.

Ang iyang agalon nga si Bomboy Loyolo mao nay mitawag sa Mobile Patrol Group aron magpatabang.

Sigun pa sa biktima niadtong Miyerkules sa gabii migawas siya sa balay sa iyang agalon kay duna kini paliton diha sa gawas apan sa pag-abot niya sa ngitngit nga bahin kalit lang siyang gihunungan og usa ka pick-up luwan ang tulo ka mga lalaki nga gibana-bana niyang nagpangidaron og 50 anyos.

Giingong dali siyang gipugngan sa mga suspek ug usa nila ang dunay panaptong dunay gituohang kemikal nga gisampong diha sa iyang baba ug ilong nga maoy nakapawala sa iyang panimuot.

Diha na lang siya nahigmata sa usa ka payag duol sa dagat apan wala siya makatuod asang dapita dinhi sa Sugbo ug diha dayon gisugdan siyag lugos sa tulo samtang nanag-inom.

Nianang pagka-Huwebes sa buntag nag-inom na sad ang tulo ug gilugos na usab siya makadaghang higayon, kagahapon sa buntag nakahigayon ang biktima og kuhag botelya sa ilimnon ug gihapak ngadto sa tulo ug midagan siya palayo sa lugar hangtud nga naabot diha sa Pelaez.

Ang kapolisan nagtuo nga dinhi ra sa dakbayan ang dapit nga gihulagway sa biktima maong ila kining gidala sa pantalan ug didto sa South Reclamation Project apan wala kini mahinumdum gumikan kay naratol pa gihapon kini maong gidala nalang siya sa Vicente Sotto Memorial Medical Center inabagan sa militanteng grupong Lihok Filipina.