Guanzon di uyon PSG man silotan

Dili kumbinsido si Presidential Assistant for Central Visayas Felix Guanzon pagrekomendar og mas bug-at nga silot batuk sa duha ka mga sakop sa Presidential Security Group (PSG) ug polis nga kauban nga nakabangga ug PUJ ug miangol sa dili muminos lima ka pasahero ug buot pa untang mag-hit and run.

Gipadayag ni Guanzon atol sa ambush interview sa mga tigbalita sa pagtambung niini sa selebrasyon sa ika-127 ka tuig nga kasumaran sa adlaw'ng natawhan ni Don Sergio Osmeña Sr. kagahapon gitugyan na niya sa Citom ang pag-imbestigar sa mga kalapasan nga nahimo nila ni Staff Sgt. Richard Josol ug SPO1 Roque Rañola.

Nasayran nga gi-release na sa Citom sila si Josol ug Rañola gumikan kay walay mireklamo batok kanila.

Matod ni Guanzon gitugyan niya ngadto sa bag-ong officer-in- charge sa Malacañang sa Sugbo Captain Jason Saldua ang pagdisiplina ug posibleng pagpahamtang ug silot sa mga sakop sa PSG.

Hinoon gibutyag ni Guanzon nga gi-atiman na nila ang mga pasaherong naangol ug ang Philippine Charity Sweepstakes Office (PCSO) maoy mipasalig nga moabaga sa tanang gastuhan niini sa tambalanan.

Samtang subling gibutyag ni Mayor Tomas Osmeña nga wala siya malipay sa maong panghitabo apan iyang giklaru nga dili gyud niya kuha-an sa mga ayuda nga gihatag sa siyudad ang mga sakop sa PSG dinhi sa Sugbo.

Kini tungod kay gasa usab nila kini ngadto sa presidente sa pagbutang niini og ikaduhang buhatan nga mao ang Malacañang sa Sugbo. Ang siyudad naghatag ug konsumo sa bugas, komunikasyon og uban pa ngadto sa mga sakop sa PSG.

Matud ni Osmeña dili siya mohimo og lakang nga magpakita sa publiko nga susamang nangita siya og away sa Malacañang ilabina gyud ngadto sa presidente mismo.

Nasayran nga unang nakabag-id og sakyanan ang Isuzu Tropper nga gimancho ni Josol sa dalan Magallanes niadtong Martes sa gabii apan inay nga mohunong mipasirit kini og palayo hinungdan nga pag-abot sa unahan nakabangga kini og jeep de pasaheroan ug lima ka pasahero ang naangol ug gidali sa pagdala sa Cebu City Medical Center (CCMC).