Mga pamilya nahasol sa away tali NPA ug AFP

Siaton, Negros Oriental -Muabot ngadto sa 151 ka mga pamilya nga mulopyo ning lungsod nga nahasol gumikan sa panag sangka tali sa militar og rebeldeng New People's Army kon NPA ang gihatagan og ayuda sa rehiyonal nga buhatan sa Department of Social Welfare and Development kon DSWD.

Ang taho sa Philippine Information Agency kon PIA mibutyag nga muabot ngadto sa P141 mil ang ayuda nga napagawas sa DSWD.

Si Velma Rago sa buhatan sa DSWD-7 mitaho atul sa tigum sa mga sakop sa Regional Disaster Coordinating Council nga gihatagan gayud nila ug tabang ang mga mulopyo sa maong lungsod.

Kadaghanan kanila mga mag-uuma nga wala na makatikad sa ilang umahan gumikan sa nahitabo nga engkwentro tali sa mga militar og NPA.

Gipalapdan karon sa militar ang ilang pagukod sa mga rebeldeng NPA nga gikataho nga nagpahigayon sa ilang operasyon ning lungsod.

Gawas niini gikataho usab nga kadaghanan kanila nagpuyo sa silingan usab nga lungsod .