E-VAT sa power pugngan

Usa ka emergency meeting ang ipahigayon karong semanaha sa Senate Justice Committee aron kapangitaan og paaging mapugngan ang gikabalak-ang pagtaas sa singil sa elektrisidad gumikan sa desisyon sa Korte Suprema nga legal ang expanded value added tax law.

Gikabalak-an nga gumikan niining desisyon sa Korte Suprema posibleng ihapak kini sa mga kompaniyang apektado sa e-VAT ngadto sa mga kunsomidor sanglit wala man i-exempt ang power producers ug mga kompaniya sa petrolyo.

Si Senador Miriam Santiago, ang Senate Justice Committee Chairwoman mibutyag nga nunot niining pagtaas sa presyo sa lana gikan sa 50 dolyares matag baril niadtong init pa kaayo ang debatihay sa e-VAT ug karon 70 dolyares na matag baril mas dakong problema ang atubangon sa katawhan.

Ang bersyon sa House of Representatives miwagtang sa exemptions sa "power producers" ug mga "oil players" sa buluhisan aron makakuha og igong pundo nga gamiton sa gobiyerno aron mapunduhan ang mga proyekto niini.

Ang bersyon usab sa Senado nga Senate Bill 2080 mihimong exempted sa exemptions sa mga power producers ug petrolyo. Si Santiago ug 10 ka mga senador nga sila si Manuel Roxas II, Rodulfo Biazon, Franklin Drilon, Jose Estrada, Luisa Ejercito, Juan Ponce Enrile, Richard Gordon, Manuel Lapid, Ramon Magsaysay Jr. ug Ramon Revilla Jr., maong author niining balaodnon.

Sumala pa ni Santiago kinahanglang dalion sa Senado ang paghisgut sa problema aron mapangitaan og paaging ma-exempt ang mga petrolyo ug power producers sanglit dili lang mga gagmay'ng katawhan ang apektado kundili bisan na gani ang ubang mga kompaniya maniyabaw gyud sa kataas sa rate ug posibleng manirado sa ilang negosyo.

Ang Pilipinas maoy labing mahal og rate sa singil sa kuryente sa pagkakaron ug kun hingpit na ganing mapatuman ang e-VAT hayan mosamot pa kini'g kataas.

Samtang ang Malacañang sa gipagawas nga pamahayag sa official website sa gobiyerno kagahapon mipasalig nga ang dugang kitaon sa gobiyerno sa e-VAT adto gamiton sa maayo ug dili angayang ikabalaka nga adto kini mapunta sa korupsiyon sa mga opisyal.

Si Ignacio Bunye, ang tigpamaba sa Palasyo nagkanayon nga idungan ni Presidente Gloria Arroyo sa pag-implementar ang e-VAT sa kampaniya batok kurupsiyon.

Bisan gani ang pipila sa mga kaparian nakakita sa problemang giatubang sa nasud sa pagkakaron gumikan ning e-VAT, matud pa nila nga kun ipatuman kini sa gobyerno ang katawhan ang apektado apan kun dili usab kini ipatuman apektado ang gobiyerno sanglit dili na kini makapadayon pa og pundo sa mga proyekto ug serbisyo para sa katawhan