Live-in partner nangahilo, patay

Mag live-in partner nga namahaw og noodles ug karne norte nangahilo. Ang bana gikompirmar nga patay sa dihang milandig sa tambalanan niadtong miaging adlaw sa alas 10 ang takna sa buntag.

Ang mga nangahilo mao sila si Remihildo Gloria, 26, lumad nga taga Surigao del Sur ug ang kapuyo niini nga si Susan Nabisaga, 14 ug lumolupyo sa Parian ning dakbayan.

Sa nasayran ang maong mga biktima namahaw og noodle ug karne norte niadtong Huwebes sa buntag ug pipila lang ka minuto human sa ilang pagkaon, nagpamati og panakit sa tiyan ang babaye ug nagsige dayon og suka.

Ang kapuyo niini nga si Gloria nakaadto pa sa iyang trabahoan sa La Nueva Supermarket kay mi-duty isip security guard, paglabay sa pipila ka oras mikalit og sakit ang iyang tiyan dayon suka.

Ang duha dali nga gidala sa Vicente Sotto Memorial Medical Center apan wala na matabang sa mga doktor sa maong tambalanan si Gloria samtang ang kapuyo niini nga si Nabisaga naluwas hinuon sa peligrong kahimtang.