Plete mosaka tungod sa eVAT

Ang pagpatuman sa Expanded Value Added Tax (e-VAT) makapapugos na usab sa mga sektor sa panakyanan sa pagpangayo og umento sa plitehan.

Kini samtang positibong gipaabot nila ang pagsaka sa prisyo sa petrolyo inigpatuman na sa eVAT.

Si Antonio Pogado, Presidente sa Nagkahiusang Drayber sa Sugbo (NADSU) nagkanayon nga ang paghimong legal sa Korte Suprema sa e-VAT, nagpasabot nga hingpit na kining ipatuman sa tibuok nasud.

Silang mga drayber walay laing gisaligan sa panginabuhi gawas sa pagpanghakot og pasahero adlaw nga tanan matud ni Pogado.

Apan kon luyo niining tanan dili na masarangan pagsaka unya sa presyo sa petrolyo, mapugos sila sa pagpangayo sa dugang umento sa plitehan.

Matud pa ni Pogado nga dili man kini kalikayan tungod kay dili man usab sila mabuhi kon mas dako ang ilang konsumo sa sugnod nga ipadagan sa ilang sakyanan kay sa ilang madala sa pamilya.

Labing nabalaka ang mga drayber ilabi na nga may pahibawo na ang Malacañang nga sa umaabot nga Oktobre ug Nobiyembre posibleng mosaka ang presyo sa gasolina ngadto sa P50 matag litro.

Kini tungod kay misaka ang presyo sa asite sa merkado sa kalibotan tungod sa dakong kadaot sa bagyong Katrina didto sa gawas.

Kon ipatuman na ang e-VAT molabaw pa ang presyo niini dinhi sa nasud sa maghinapos kining tuiga ug nalantawan na sa mga drayber ang kabug-at sa ilang sagubangon sa umaabot nga adlaw.

Maoy hinungdan nga matud pa ni Pogado, nga ilang gitun-an karon ang tanang mga paagi, apan wala silay mahimo tungod kay dili kalikayang atubangon sa tanan kining maong krisis.

Busa silang mga drayber mopadagan lang sa mga sakyanan kon may mahimo pa sila.

Bahin sa welga, mao rag nakatilaw nag tagam ang mga drayber karon ilabi na nga daghan na kaayong dili mokuyog kanila sa pagwelga, apan mapugos gyud tingali ang tanan kon wa na gyud silay mahimo, matud pa ni Pogado.