Misis, tupad ni mister, gikamang

Usa ka 30 anyos nga ginang ang gikamang og usa ka ulitawo samtang natulog uban sa iyang kapikas didto sa Barangay Canbanua, lungsod sa Argao.

Personal nga mireport sa kapolisan si Eva (apelyido gipugngan) kabahin sa reklamo nga niadtong miaging kaadlawon, gikamang siya sa usa ka ulitawo nga nailhang si Michael (apelyido gipugngan) hingkod ang panuigon ug molupyo ra usab sa naasoy'ng dapit.

Si Eva miasoy sa kapolisan nga samtang nahinanok siya sa pagkatulog tupad sa iyang bana nga lapoy kaayo, nakamatngon siya nga gipanghikap ang pribadong parte sa iyang kalawasan ug wala lang siya mireklamo sa pagtuo nga ang maong mga kamot sa iya rang bana.

Apan pagbuka pa niya sa iyang mga mata, nakugang na lang siya kay lain man diay'ng tawo ang anaa sa iyang atubangan hinungdan nga nakasinggit kini.

Dali nga nakamata ang iyang bana apan uwahi na kay kusog kaayong nakadagan ang suspetsado.

Si PO2 Dexter Basergo sa Argao Police mitataw nga si Michael giingong anak sa usa ka konsehal sa nahisgotang barangay apan dili pa kini konpirmado.

Sa pagkakaron gawasnon pa gihapon kining maong suspetsado kay wala pay pormal nga kaso nga gipasaka.