Ang gidakop sa awtoridad didto sa Calape, Bohol kagahapon sa buntag mao si Jeremy Dean Dunlap, 60, lumad nga taga Oregon, Washington.
Ang record sa immigration nagpakita nga si Dunlap misud sa nasud niadto pang Agosto sa tuig 2003 ug naminyo na gani og usa ka Pilipina nga molopyo sa lalawigan sa Bohol.
Si Dunlap gikatahong paingon na untang mosakay og barko paingon dinhi sa Sugbo sa dihang nasigpatan kini sa mga sakop sa NBI ug Immigration. Wa hinuon mopakita og pagsukol si Dunlap sa dihang gisignit kini sa mga sakop sa NBI ginamit ang federal warrant of arrest.
Sa pakighinabi sa BANAT News ni NBI regional director Medardo de Lemos kini miingon nga ang embahada sa Amerika nangayo og panabang kanila aron pagsikop ni Dunlap nga nag-atubang og unom ka kasong pagpanglugos didto sa Superior Court sa Washington Estate.
Si Dunlap gitugyan na sa immigration kagabii ngadto sa mga sakop sa U.S. Marshals nga maoy mo-eskort kaniya balik didto sa Amerika aron pag-atubang sa iyang mga kaso.