Military jeep para prov'l police gihatag

Dugang 12 ka mga military type jeeps alang sa Cebu Provincial Police Office ang gi-turn over sa buhatan ni Gobernador Gwendolyn Garcia kagahapon, kalabot kini sa tulo ka hugna nga delivery sa kapitolyo isip tabang sa CCPO.

Si Garcia sa turn-over ceremony kagahapon nagkanayon nga prayoridad nga tagaan sa maong mga sakyanan mao ang kalungsoran ilabi na kadtong mga dapit nga daghang mga bukirong barangay sama sa Carmen ug Catmon.

Namatikdan nga ang pag-turn over sa maong mga sakyanan natumong gyud dihang nabalik isip hepe sa CCPO si Supt. Vicente Loot kinsa nawagtang sulod sa tulo ka bulan gumikan sa reklamong kulang kini sa kwalipikasyon sumala pa sa higpit nga ribal ni Garcia nga si 4th District Rep. Clavel Asas Martinez. Ang magbabalaod mao say ribal nga kaatbang sa politika sa asawa ni Loot nga si Mayor Malou Loot sa Daanbantayan.

Ang maong mga sakyanan i-apod-apod unya sa mga kalungsoran sa Balamban, Sibonga, Danao City, San Francisco, Carcar, Ronda, Pilar, Alegria, Madridejos, Carmen, Catmon ug ang usa alang sa CCPO.

Gawas sa mga sakyanan, usa sa mga proyekto ni Garcia ug Loot mao ang pagbutang og mga base radio sa 47 ka mga police stations sa lalawigan, lima ka VHF "repeaters" sa lalawigan, usa sa Negros ug usa sa Bohol aron madali ang komunikasyon.

Miangkon si Garcia nga malisod ang pag-apas sa ideyal nga ratio sa sibilyan ug polis nga usa ka polis kada 500 ka tawo sanglit ang mismong national headquarters sa PNP nagkaproblema sad kay sa kinatibuk-an sa usa ka polis dunay bantayanang 1,200 ka tawo.

Apan bisan pa man sa kakulang padayon gihapon ang kampanya sa kapolisan batok sa ilegal nga mga kalihukan. Si Loot maoy nakapahinay sa operasyon sa mga ilegal nga sugal ug drugas sa lalawigan niadtong miasumir siya hulip ni Sr. Supt. Maximo Calimlim.