Sumala pa ni Jakosalem sa Banat News ang maong kahimanan gikinahanglan kaayo sa mga polis sa dakbayan ilabi na niadtong mga "frontline units" sama sa Mobile Patrol Group ug Crime Suppression Unit aron dili magpanagana sa pagtuman sa ilang trabaho.
Gihimong ehemplo ni Jakosalem ang nahitabo nila ni PO2 Armand Juegos ug PO2 Oliver Jamboy didto sa Nivel Hills niadtong Domingo diin ang suspek nga si Prudencio Bores dunay deperensya sa pangisip ug hubog apan wala madali-dali og sikop kay misukol kini ug miresulta hinuon sa kamatayon nilang tulo.
Ang iyang irekomendar mao ang paggamit og "teargas" nga ipasirit sa nawong nga kun didto paliton sa gawas sa nasud magkantidad lang og 20 dolyares, "stun baton" nga kun ibunal mawad-ag kusog ang suspek, nagbalor lang og 40 ngadto sa 50 dolyares ug ingon man ang pagtudlo sa mga polis og pangamot, ning paagiha sa gamay'ng kantidad daghang kinabuhi ang masalbar.
Sa pagkakaron plano ni Jakosalem nga duolon ang pamilyang Cañete nga maoy hanas sa paggamit og arnis ug eskrima apan wala usab isalikway ang pagpatudlo unya og mga langyawng "martial arts."
Gitug-an sa konsehal nga didto sa Estados Unidos kumpleto na sa kagamitan ang matag usa ka polis , apan nahibaw-ang bisan pa man niini base usab sa pamahayag sa kanhi polis didto sa US nga si Bing Mendezona nga mao na karon ang Chief Security sa Aboitiz, mayoriya sa mga napatay nga polis didto giunay sa ilang armas.