2 polis gitodas

Duha ka mga sakop sa Crime Suppression Unit (CSU) napatay niadtong milabay'ng gabii human usa kanila ang nailogan og armas sa gidudahang deperensiyado og pangisip nga nanghasi nga ilang girespondehan diha sa Sitio Nivel Hills Barangay Apas ning dakbayan. Ang suspek napatay usab sa usa sa mga napatay nga polis.

Ang nangamatay mao sila si PO2 Armando Juego,35, minyo ug kauban niining si PO2 Oliver Jamboy,31, ulitawo pulos mga sakop sa CSU sa Cebu City Police Office human sila pamusila ni Prudencio Bores,42, minyo molupyo sa maong lugar.

Nagduda ang kapolisan nga kanhi sakop sa militar ang suspek gumikan sa kahanas niini sa paggamit og armas ug nakahibalo kun unsaon ang paagi sa pakigbuno bisan polis ang kaatbang niini. Dunay mga dili kumpirmadong report nga nag-ingong kanhi "Kadre" sa militar si Bores ug nagkadeperensya ang pangisip niini samtang kini sakop pa sa militar.

Sumala pa sa imbestigasyon ni SPO3 Alex Dacua sa Homicide Section ang duruha luwan sa CSU-504 aron tubagon ang protection alarm sa maong dapit kalabot sa family trouble diin si Bores gireklamo sa iyang asawang si Teofila gumikan sa pagpanakit niini tungod usab sa kahubog.

Giingong pag-abot pa lang sa duha gisugat na dayon og kahoy ni Bores si Juego ug giilog ang armas niini maong nahitabo ang pinusilay ug ang tulo pulos nakaagom og mga samad pinusilan.

Apan sa mga nanggawas nga report sa mga lokal nga sibyaanan nagkanayon nga pag-abot pa lang sa duha sa dapit si Juego maoy unang mikanaog samtang si Jamboy nagpahimutang pa sa sakyanan. Matud pa nga gipasidan-an nang daan ni Teofila si Juego nga dunay gihuptang kahoy si Bores apan midiretso gihapon ang polis bisan wala pa ang iyang kauban.

Nianang tungora gikatahong gisugat kalit si Juego sa suspek diha sa ngitngit nga bahin dayon gihampak og kahoy ang bukton niini hinungdan sa pagkahagba sa polis diha sa yuta ug giyak-an kini sa suspek aron ilugon ang armalite hangtud nakakita og higayon si Bores, gihulbot ang "low carry" nga 38 kalibre revolver sa polis ug gidul-itag pusil ang ulo ni Juego.

Dihadiha usab ang pag-abot ni Jamboy kinsa nakadungog na sa buto sa armas apan nakugang kini kay siya man usab ang gibirahan sa suspek ug naigo kini sa suwang nga milapos sa luyong bahin sa ulo niini, apan una pa matumba si Jamboy nakakablit pa kini sa iyang armas tumong sa dughan sa suspek lima ka higayon, hinungdan sa kamatayon ni Bores.

Ang duha ka polis daling gitabang sa mga molupyo ug si Vaughn Areola kinsa sakop sa Bicycle Traffic Enforcer sa City Traffic Management Office (CITOM) nga nagpuyo sa maong lugar maoy mimaneho sa patrol car sa mga biktima ug gidala sa Vicente Sotto Memorial Medical Center.

Si PO2 Juego gideklarar nga dead on arrival samtang si Jamboy nabugtuan sa iyang kinabuhi diha sa usa ka pribadong tambalanan pila ka gutlo.