2 ka tawo naangol sa 2 sab ka sunog

Duha ka sunog ang gitubag nga alarma sa Bureau of Fire Protection (BFP) sa siyudad sa Lapu-Lapu sa managkalahing takna ug dapit niadtong miaging adlaw nga maoy nakaingon sa pagkapaso sa usa ka tawo.

Ang unang alarma nga nahitabo sa Interior Basics Export Corp. sa purok Casanta sa sitio Soong sa barangay Mactan sa siyudad sa Lapu-Lapu mao ang kalit nga pag-ulbo sa press machine nga nagsugod sa ground floor niini ug mokabat sa P100, 000 ang danyos niini.

Si Edwin Radaza, hingkod ang panuigon, minyo nga nagtrabaho sa nahisgotang establisamento ang nakabaton gayod og mga paso sa iyang nawong ug bukton dihang gihimo unta ang pasiunang pagpawong niini.

Si SFO1 Rodulfo Apa nga maoy imbestigador sa BFP sa maong dakbayan nga maoy mitubag sa alarma ang miingon nga kalit lang mi-over hit ang makina tungod sa subrang paggamit og dali nga nakamugna og kalayo.

Ang laing sunog nga nahitabo sa dalan M. H. del Pilar nga miugdaw usab sa duha ka mga panimalay nga gipanag-iya sa managsoong Semaco Laguna sa barangay Gun-ob sa dakbayan sa Lapu-Lapu.

Sa nahibaw-an gikan kang SFO1 Diomed Alburo sa kabomberohan sa maong dakbayan maoy nahibaw-an nga ang kayo nagsugod sa kisame niini tungod usab sa faulty electrical wiring niini.

Mokabat sa P800,000 ang danyos niini apan walay tawo nga naangol atol sa maong insidente.