Hinuon nasalbar sa mga bala sa armas sa taga Cebu Provincial Police Office (CCPO) si Jimmy Barliso, 46, minyo, taga Lower Mohon, Talisay City.
Didto siya hipusili sa barangay Malbago, Badian diin siya magtago human makapatay.
Si PO3 Danilo Teopis, desk officer sa Badian Police Office nagkanayon nga miabot ang mga sakop sa Provincial Intelligence and Investigation Brand (PIIB) sa CPPO nianang alas 2:00 sa hapon ug igo lang mipahibawo kanilang taga Badian nga may dakponon kining wanted sa Malbago.
Apan dihang dakpon na unta ang maong wanted, misukol kini kang Po3 Tiburcio Hiramel, ang lider sa kapolisang gikan sa CPPO.
Human sa warning shot nga duha ka buto, gipalipakan nalang ni Hiramel sa iyang mga bala ang nagkalainlaing bahin sa lawas sa kriminal hinungdan nga nadala kini sa hospital sa Sugbo.
Matud pa sa kapolisan sa Badian nga wala sila masayod sa pagpuyo sa maong kriminal sa Malbago kon kanus-a kini magsugod tungod kay wala sila makaila sa maong tawo ug wala usab kini makamugna og kagubot sa Badian.
Sa laing bahin ang kapolisan sa Talisay City kagahapon misuta pa usab sa rekord ni Barliso tungod kay gabii na kaayo niadtong Biyernes sila makahibawo sa maong hitabo.
Matud pa ni SPO3 Jose Noel Factores nga giradyohan nalang sila sa taga Badian bahin sa maong wanted nga tawo nga napusilan sa taga CCPO didto sa Badian nga giingong taga Talisay.