Kursong bokasyonal maayo para's kabos

Ang pagdangop sa kursong bokasyonal maoy yawe alang sa mga kabos aron makalampos og kurso sa kolihiyo, matud pa ni Engr. Ernesto Beltran, regional director sa Technical Educational Skills and Development Authority (TESDA-7).

Si Beltran mitug-an sa tulumanon "Government on Line" sa DYMR Radyo ng Bayan Cebu nga dili lamang para molampos og kurso, apan labaw sa tanan nga pagbaton og "skill" o trabahong hiantigohan sa usa ka tawo, maoy importante karon.

Ang kalisod sa ekonomiya maoy babag sa paglampos sa usa ka estudyanteng kabos pagkahuman og kurso sa kolehiyo, matud niya.

Apan midugang si Beltran nga daghan usab nga gradwado nga walay trabaho tungod sa kalisod sa panarbaho karong panahona.

Maoy hinungdan nga gitudlo ni Beltran ang sekreto aron siya makatabang og dako niadtong mga ginikanan nga kabos.

Diha sa Tesda naay minugbo nga kursong bokasyonal nga mahuman lamang duha, tulo o upat ka buwan, depende sa kahait og pangutok sa usa ka estudyante.

Gipasalig usab ni Beltran nga kutob sa naka-eskuyla sa Tesda, 60 porsento kanila ang makatrabaho dayon inig graduwar.

Ang Tesda usa ka ahensya sa kagamhanan nga gibuksan alang sa mga nanagtungha ug wala na magtungha nga tawo.

Ang tanang kursong bokasyonal nga maoy tubag sa kasamtangang panginahanglan sa nagkalainlaing industriya sa nasud bukas alang sa tanan.

Ang usa ka estudyanteng mogradwar sa high school mahimong mopa-enroll sa Tesda ug kon mogradwar ug makakaplag na og trabaho, anha na mopadayon pagkuha og kursong dinagko sa kolihiyo.

Tungod kay naanad nag panarbaho, inig gradwar sa kurso sa kolihiyo dali na lang kaayo makasulod og trabaho, matud pa ni Beltran.

Midugang siya nga sa pagkakaron labi pang gipausbawan sa Tesda ang iyang mga kahimanan nunot sa nagkadugang nga gidaghanon sa estudyante niini.