Si Acting Cebu City Police Chief Melvin Gayotin mitug-an sa Banat News nga nakadawat sila og impormasyon ang intelligence community nga nangabot na ang maong grupo ning semanaha ug didto kini mangagi sa Dumaguete ug mitabok dinhi sa Sugbo.
Gidudahan sa kapolisan nga kasamtangan na karong naghimo og mga plano kun asang bangko o dili ba kaha pawnshop ang ilang tulison.
Si Gayotin miangkon nga nailhan na ang sakop sa militar nga lider niini apan dili pa kini ikabutyag sanglit padayon pa kining gisubay kun aktibo pa ba sa militar.
Nunot niining hulga gimando ni Gayotin sa iyang mga sakop ang pagpabalik sa mga random checkpoints nga ning bag-uhay lang namatikdang wala nasad kaayo i-implementar sa mga police stations.
Samtang gisubay na karon ni Gayotin ang mga dapit diin kadaghanan ang mga bangko ug mga pawnshops mahimutang aron maoy butangan og mas daghang mga polis ingon man mga sakop sa Crime Suppression Unit ug mga beat patrols.
Mipahimangno usab si Gayotin sa mga nanag-iyag mga patigayon sa pagpahugot sa ilang seguridad pinaagi sa pagdugang og mga gwardiya sa ilang establisamento. Siya midugang nga gihimo niya ang pagpahibalo niini aron makabantay nang daan ang katawhan ug mga negosyante.
Kasagarang mga tulisan nga mangigo dinhi sa dakbayan dayo gikan sa Mindanao susama nila ni Rey Ruth "Roel" Torres ug Danilo Limotan ingon man ang Ilongo Solido Group nga miigo sa Land Bank P. del Rosario Branch kaniadto.