Modernong presinto, bomberohan sa Mabolo gisubhan

Gitambungan sa mga opisyal sa siyudad sa Sugbo, kapolisan ug kadagkuan sa Cebu Chamber of Commerce and Industry (CCCI) ang pagsubo kagahapon sa bag-o ug modernong buhatan sa Mabolo Police Station ug Mabolo Fire Substation nga nahimutang sa North Reclamation Area ning dakbayan.

Ang Aboitiz Group Foundation, Incorporated (AGFI) maoy mi-abaga sa gastuhan pagtukod sa edipisyo sa presinto sa kapolisan ug fire sustation.

Kini ubos sa gipatumang programa sa siyudad, kapolisan ug CCCI nga "adopt-a-police station program" diin ang karaang ug guba-ong estasyonan sa kapolisan ug fire station sa Mabolo maoy pilot project.

Ang presidente sa AFI Jun Ramos mipasabot nga tumong sa ilang pagsuporta sa kapolisan aron mamintenar ang kahusay ug kalinaw sa Sugbo ug gipasalig nila nga magpadayun ang ilang suporta ngadto sa organisasyon sa kapolisan ning dakbayan.

Ang CCCI pinaagi sa presidente niini nga si Robert Go mipasalig usab sa hugtanong suporta ning maong programa gumikan kay nakita nila nga importate kaayo ang kahusay ug kalinaw dili lang kanilang mga negosyante kun dili ngadto sa tanang Sugboanon.

Samtang gipasalig usab sa kanhi presidente sa CCCI Joe Ng nga sunod nilang asikasohon ang pagtukod ug laing bag-ong buhatan sa kapolisan diha sa Waterfront Police Station nga mahimutang sa may Plaza Independencia sa luna nga gipanag-iya sa ALU ug karung sunod bulan ang gitakdang pagsugod sa konstruksiyon.

Si mayor Tomas Osmeña mipasalamat sa gipakitang kooperasyon sa mga negosyante sa Sugbo aron matubag ang panginahanglan sa kapolisan ilabina gyud ang pagpa-angay og modernong buhatan.