Ekstrador og taxi gilabog sa Liloan

Napalgang patay ang usa ka ekstrador sa taxi nga may samad pinusilan sa iyang ulo nga gituohang gilabog diha sa Barangay Jubay lungsod sa Liloan kagahapon sa kaadlawon.

Gituohang ang biktimang si Mario Obanos, 30, molupyo sa Barangay Gindaruhan, lungsod sa Minglanilla gitulis sa iyang mga pasahero ug diha lang kini gilabay sa maong dapit.Ang biktima gikatahong lay minister sa simbahan.

Ang presinto tres sa Mandaue City Police Office nakadawat og tawag gikan sa Patrol 117 kalabot sa usa ka abandonadong taxi nga iya sa Emerson Taxi nga may plakang GWR-123 diha sa dalan H.Abella Sitio Bas, Barangay Jagobiao nga giingong nagkadugo ang mga lingkuranan.

Sumala pa ni PO1 Germinio Caylan sa Banat News base sa asoy sa dispatcher sa Emerson Taxi nga si Robert Milana ang nagmaneho niini mao si Obanos nga miekstra sa drayber sa maong unit.

Didto sa Liloan Police, base sa imbestigasyon alas 3 sa kaadlawon usa ka Faustino Bulfanco diha sa barangay Jubay kinsa natulog gawas sa iyang tindahan nakadungog og saba kaayong panag-istorya sa mga tawong luwan sa lanog kaayo og tingog nga motor ug nadungog niining dunay gibilin ang maong mga tawo sa dayong ikyas.

Nunot niini, daling gipahibalo ni Bulfanco ang guwardiya sa sikbit nga Sheldon Philippines Incorporated nga si Ernesto Mendoza ug ilang gisubay ang dapit diin mihunong ang mga nagmotor, tuod man ilang nakitang nagbuy-od ang biktima sa dalan ug patay na kini.

Gituohan sa kapolisan nga gitulis ang biktima sanglit wala na ang kinitaan niini og ang cellphone.