Gawas sa dengue, kuyaw sad ang cholera

Gawas sa pagsaka sa sakit nga dengue laing gikabalak-an nga mosi-aw usab karon niining panahon sa ting-ulan mao ang diarrhea, typhoid fever ug cholera.

Ang gihimong survey sa Food and Nutrition Research Institute kon FNRI sa Department of Science and Technology (DOST) nagpakita nga sagad sa mga kabataan nga makasinati ning maong matang sa sakit mao kadtong mga mamalitay ug pagkaon gikan sa mga ambulant ug sidewalk vendors nga peligro kaayo ang mga baligya niini nga mataptan sa kagaw nga nagdala sa nahisgutang sakit ilabina gyud niining panahon sa ting-ulan.

Tungod niini gi-awhag ni konsehal Edgardo Labella ang Department of Education kon DEP-ED pagkombinsir sa mga ginikanan nga sakop sa Parent Teachers Community Associations (PTCA) nga mas maayo nga andaman nalang niini ang ilang mga anak ug balon nga pagkaon aron dili na magpataka og palit og pagkaon gikan sa mga sidewalk vendors nga dili syento porsyento nga limpyo nga kan-on sa mga bata.

Si konsehal Labella gitakdang mopalabang ug resolusyon alang ning maong katuyo-an atol sa sesyon sa konseho sa dakbayan karung Miyerkules sunod semana aron paghimong pormal sa mao niyang awhag sa mga magtutudlo ug ginikanan nga siguro-ong limpyo ang pagkaon nga maka-on sa ilang mga anak didto sa mga tunghaan.