Final na: No Sugbuak hearing dinhi

Lig-on pa sa batong bantilis ang baroganan ni Kongresista Emilio Macias batok sa awhag nga himoan og public hearing ang Sugbuak nga isyu dinhi sa Cebu.

Matud pa ni Macias nga bisan kinsa pay mobarog niining Kongresista, taga simbahan, ug mga lokal nga opisyal sa kagamhanan, dili na matuis ug malalis ang iyang hukom nga adto nalang sa plebisito sutaa ug ipabuhagay ang sentimento sa tanan," matud pa niya.

Gipasabot ni Macias nga mas maayo pang hunongon na ang maong isyu kay dili na niya mausab ug dili na maliso ang iyang baroganan sama sa buko sa kawayan.

Iyang gipatin-aw nga subay sa balaod, ang public hearing nga angayang himuon, ug iya nang nabuhat nga mao ra ang pagtino kon ang mga proponente kon aplikante sa katukoran sa Cebu del Sur, Cebu del Norte ug Occidental Cebu, pasado ba sa mga rekisitos, sama sa land area, population, ug income.

Apan human na kini himoa sa iyang komitiba ug gipasa na niya ang maong mga proposal kon balaodnon karon sa committee on rules sa Kongreso.

Midugang si Macias nga daghan pang mga proseso ang subayon didto sa Kongreso una himoa ang plebisito.