14-anyos katabang gitabanga'g lugos

Dalagitang katabang mireklamong gitabangan og lugos sa duha ka managbayaw diha sa usa sa mga bukirong barangay ning dakbayan niadtong milabay'ng adlaw.

Ang biktima kinsa katorse anyos ang pangidaron giingong nagtrabaho sa igsuon sa usa sa mga nadakpang suspek nga si Martin Limotan, 42, molupyo sa maong barangay.

Sama sa naandan, walay polis sa Womens Desk sa Cebu City Police Office ang nakahatag og ensaktong impormasyon kalabot sa hitabo sanglit subay sa balaod protektado ang kababayen-an sa bisan unsang pagpangabuso ilabi na kadtong nabiktima sa susamang hitabo.

Apan sa migawas nga dili kumpirmadong report gikan sa lokal nga sibyaanan giingong ang biktima gitabangan og lugos sa duruha diha sa balay sa agalon niini ug usa ka habal-habal drayber nalang ang naghatud niini diha sa Talamban Police Station.

Ang kapolisan sa Talamban mao nay miresponde sa lugar ug maoy nakasikop kang Limotan samtang nakaikyas ang laing suspek nga si Rodrigo Luciano,35, molupyo usab sa maong dapit.