Nang-imprinta'g pekeng SRP pass ipasira ni Tom

Gimando ni Mayor Tomas Osmeña ang closure order kon pagpasira batuk sa operasyon sa Gold Finger Computer Printing Shop nga nahimutang diha sa 3rd level sa SM City Cebu nga nasakpan nga tig-imprinta og mga peke nga SRP pass ingon man mga peke nga business permit ug drivers license ug uban pa.

Atol sa press conference kagahapong adlawa gitug-an ni Osmeña nga dugay na nga gipaubos sa surveillance ang maong establisamento gumikan sa natiktikan nga mga binuang nga transaksiyon niini.

Hinuon gibutyag ni Osmeña nga dili kaayo usa ka seryoso nga butang ang pagpanghimo og peke nga SRP pass sa maong establisamento gawas lang sa ubang mga butang sama sa business permit ug uban pang mga gi-peke niini.

Nasayran nga ubay-ubay na ang gipasakaan og kaso sa siyudad nga mga nasakpan nga naghupot og peke nga SRP pass nga ilang gigamit aron makasayon sayon og agi diha sa maong coastal road.

Nunot niini, mipasalig ang mayor nga mohatag og ganti ngadto sa mga sakop sa CIDG-7 nga maoy nakasikop sa mga pagpanghimo og peke nga mga dokumento sa maong establisamento sa gilusad nga pagpang-ronda niini niadtong milabay'ng Martes sa gabii.

Ang tagdumala ug nanag-iya sa maong computer printing shop nga si Consuelo Young gitakda kining pasakaan og kasong falsification of public documents.