Videoke houses pasirad-an sa City Hall

Gimando sa Cebu City Hall nga pasirad-an ang tanang mga videoke houses nga nahimutang duol sa mga tunghaan dinhi sa dakbayan sa Sugbo, kini tungod sa daghang mga reklamo gikan sa mga ginikanan gumikan ning pagpakabuang karon sa ilang mga anak ning maong kalingawan.

Gibutyag ni Cristopher Ong, hepe sa Revenue Task Force sa City Treasurer's Office nga apil karon sa ilang gipadad-an og 72 hours nga notisya alang sa paghunong sa ilang operasyon mao ang mga manindahay og ilimnong makahubog nga nahimutang dili molapas ug usa ka gatus metros gikan sa mga publiko ug pribadong mga tunghaan dinhi sa dakbayan.

Gibutyag ni Ong dihang nahinabi sa Banat News nga kagahapong adlawa dunay duha ka mga videoke house nga nahimutang atubangan gyud sa Cebu Institute of Technology (CIT) ang gipadad-an og notisya sa City Hall ug gimanduang mohunong sa ilang operasyon.

Matud ni Ong walay mga business permit ang maong mga videoke house gumikan kay ilegal ang operasyon kay duol ra sa tunghaan.

Apil sa mga gipadad-an og notisya mao ang mga videoke houses nga nahimutang duol sa mga tunghaan sa University of San Carlos-Talamban ug ang mga videoke houses duol sa Pasil Elementary School.

Nasuta usab nga ang uban ning maong mga videoke houses ang namaligya usab og ilimnong makahubog ngadto sa mga tinun-an nga walay permiso sa Liquor and Licensing Division sa City Hall.