Naunay sa iyang espada's samurai

Naunay sa gidalang espada sa "samurai" ang usa ka lalaking nanulong sa silingan gumikan sa painitay sa istorya diha sa Sitio Sto.Niño Barangay Cogon ning dakbayan niadtong nakalabay'ng gabii nga misangpot sa rambol ug nakaangol og tulo ka tawo.

Parehong samdan ang tulo nga sila si Algerio Cabanada,40, anak niining si Aldren Cabanada,18, ug Danilo Sanchez, pulos managsilingan sa maong lugar.

Si Homicide Section Investigator PO3 Robert Escarlan mitug-an sa Banat News nga sa sayo pa dunay gikalalis ang amahang Cabanada sa silingan ra usab nila ug miingong bisan magpalaban pa kini kang Sanchez.

Si Sanchez ug Cabanada gikatahong dugay nang nagbingkil maong miabot si Sanchez gisulong niini si Cabanada diha sa ilang balay.

Giingong kalit lang gidunggab ni Sanchez sa gidalang 28 pulgadas nga espada si Cabanada makadaghang higayon ug naigo diha sa likod, ang anak ni Cabanada nga si Aldrin kinsa nakakita mitabang dayon sa iyang amahan ug nakig-ilog kang Sanchez sa espada.

Dihang nailog sa manag-amahan gikatahong gitabangan nila kini og dunggab ug tigbas sa ulo ug kalawasan apan naabtan kini sa umagad ni Sanchez nga si Sabino Blanco,21, minyo kinsa misunod diay sa iyang ugangan ug armado usab og 10 pulgadas nga kutsilyo ug misalmot sa karambola.

Ang anak ni Cabanada nadunggaban ni Blanco diha sa buko-buko hinungdan nga ang tulo parehong milandig sa Cebu City Medical Center.