Bicycle lane sa karsada gitinguha

Paggamit og bisekleta maoy usa sa mga nakitang paagi ni Konsehal Arsenio Pacaña ang tsirman sa Committee on Tourism sa konseho sa dakbayan sa Sugbo nga mamenusan ang gastos sa enerhiya, apan usa sa mga problemang iya dayong nakita mao ang kahagip-ot sa mga dalan sa Sugbo.

Si Pacaña sa pakighinabi sa Banat News mitug-an nga ang bisekleta maoy labing maayong alternatibo sa paggamit og sakyanang mogamit og petrolyo, gawas nga maayo kini sa panglawas, malayo usab ang palibot sa polusyon ug labaw sa tanan walay gastos sa lana.

Gibutyag ni Pacaña nga kini maoy usa unya sa ilang tukion sa iyang ipasa nga resolusyon ngadto sa konseho ugmang adlawa kun unsaon pag-atubang ning problema sa krisis sa lana karon sa nasud.

Apan bisan paman sa maayong suhestiyon giangkon ni Pacaña sa kasamtangang kahimtang sa mga dalan sa dakbayan malisod pa ug dili praktikal nga ipatuman ang paggamit sa bisekleta sanglit sa pagkakaron walay "bicycle lane" ang kadalanan kun itandi sa China.

Matud pa niini nga peligro sa mga tawo ang kadalanan gawas lang kun adto kini gamiton sa mga subdibisyon ug mga dalan nga wala kaayoy trapiko.

"Kun pananglitan nga pagamiton ta og bisekleta as alternative karon dili kini mahimo not unless usbon nato ang mga structural design sa atong mga dalan,"asoy pa niini.

Lakip sa buot niyang hisgutan mao ang pagpakonbertir sa mga makina sa mga sakyanan gikan sa ordinaryong makina nga mogamit og gasolina ug krudo ngadto na sa liquefied petroleum gas (LPG) ug ingon man ang pagseryoso sa gobiyerno nga suportahan ang nanggawas nga balitang dunay Pilipino nga nakakita og paagi nga magamit ang tubig isip hulip sa gasolina sa sakyanan.