Turismo tuyo sa Bakasi fest

Ang pagpaila sa lungsod sa Cordova ngadto sa mga langyaw nga turista ug mga dumoduong nga gikan sa uban nga mga lalawigan maoy nag-unang tinguha sa mga opisyal sa maong lungsod sa ilang pagpasiugda sa Bakasi Festival.

Kini maoy nag-unang kalihukan nga gipasiugdahan sa kagamhanan sa maong lungsod nga nagsaulog sa tinuig nga pangilin sa matag Agosto 15.

Ang maong kalihukan nga apilan sa mga contingent nga naggikan sa kabarangayan sa maong lungsod ug ingon man sa naggikan sa mga lungsod ug siyudad sa Sugbo.

Si Mayor Arleigh Sitoy nga gikahinabi sa mga tigbalita mipasabot nga ang bakasi nga usa ka matang sa isda sa dagat nabantog sa ilang dapit. Ang mga lumad nga Sugboanon maoy nag-una sa kusog nga mosud-an niini pinaagi sa pag-un-on nga parisan sa kan-on nga mais.

Ang Bakasi Festival himuon atol sa besperas sa kapistahan sa maong lungsod.

Midugang sa pagpasabot si Sitoy nga ang ilang pasiugdahan nga Bakasi Festival walay kalainan sa Dinagat Festival nga gipasiudahan niadtong pipila na ka tuig nga nakalabay.

Ang maong kalihokan ilang gipalambo ngadto sa Bakasi Festival aron pinaagi niini mahimong mainila ngadto sa uban ang Cordova tungod sa isdang Bakasi ug madasig ang mga langyaw sa pagduaw sa ilang lungsod.