Wa hatagig marijuana namusil

Samad pinusilan ang naangkon sa usa ka lalaki dihang napakyas kini paghatag og marijuana sa usa ka drug addict didto sa Barangay Tulay lungsod sa Minglanilla sa 1:00 sa kaadlawon kagahapon.

Ang biktima ginganlan nga si Rolando Quimada, 38 anyos ang panuigon ug molupyo sa nahisgutang dapit anaa karon sa peligro nga kahimtang tungod sa mga samad pinusilan nga iyang naangkon sa iyang buko-buko, bukton ug baba.

Sigon sa asoy ni SPO4 Dominciano Savellano, ang suspetsado nailhan lang sa ngan nga "Amay" ug gidungog gayud nga mogamit og ginadiling druga.

Gikataho nga ang maong suspetsado nangayo ug marijuana kang Quimada apan wala kini hatagi hinungdan nga gipusil siya niini samtang kini natulog sa iyang kaugalingong panimalay.

Si Quimada dali nga gidala sa Vicente Sotto Memorial Medical Center, apan pabilin gihapong gawasnon si Amay ug padayon nga gipangita sa mga kapolisan sa lungsod sa Minglanilla.