Miluba sa iyang misis naghikog

Bana gituohang naghikog ginamit ang mahait nga hinagiban human madunggabi ang iyang asawa atol sa ilang panag-away didto sa sitio Panagatan Barangay Bawo lungsod sa Sogod niadtong milabay'ng Biyernes sa buntag.

Sikopon unta sa kapolisan si Fulgencio Avila,46, minyo lumad nga taga barangay Pulang Yuta dakbayan sa Danao ug kasamtangang nagpuyo uban sa iyang asawa sa maong lugar , apan sa pag-abot sa kapolisan patay na kini diha sa sulod sa kinandaduhang lawak.

Sa sayo pa ang biktima ug ang asawa niining si Thelma Avila,43, nakit-an sa ilang silingang si Bethoven Padin nga nag-away ug nagbugnuay diha sa sulod sa ilang balay.

Dangtan pila ka gutlo nakit-ang midagan pagawas si Thelma nga nagkadugo ug nangayog panabang gumikan kay nakaangkon kini og daghang samad dinunggaban sa nagkadaiyang parte sa lawas.

Daling gidala si Thelma sa mga silingan ngadto sa tambalanan samtang gipatawag usab ang mga polis aron unta adtuon ug sikupon si Fulgencio.

Apan pag-abot sa kapolisan giingong naa sa sulod sa lawak nga gikandaduhan si Fulgencio. Dihang giablihan og pugos sa mga polis mao nalay ilang naabtan nga nagbuy-od ang biktima nga nagkadugo ug wala na usab kini kinabuhi.

Usa ka 16 pulgadas nga bolo ug laing usa ka kutsilyong upat ka pulgadas nga naguba ang puluan ang nakit-ang tupad sa biktima.

Nagtuo ang kapolisan nga posibleng naghikog kini sanglit wala may nakit-ang laing tawong misulod diha sa ilang balay. Samtang gisusi pa karon sa kapolisan ang hinungdan sa panag-away sa managtiayong misangpot sa pinatyanay.