Holiday sa Talisay karong Agosto 16

Si Talisay City Mayor Socrates Fernandez miluwat og executive order niadtong Agosto 11 nga nagdeklarar nga karong petsa 16 niining buwana usa ka "non-working holiday."

Ang maong mando gihimo aron paghatag og kahigayonan sa mga lumolupyo ug mga empleyado sa nagkadaiyang buhatan sa dakbayan nga mosalmot sa ika 169 nga founding anniversary sa siyudad.

Usa sa mga "highlights" sa maong selebrasyon mao ang paglusad sa labing unang "Inasal Festival" nga mahitabo usab sa nahisgutang adlaw.

Si konsehal Shirley Belleza, tsirman sa komitiba sa turismo, kultura ug kasaysayan nagkanayon nga ang maong okasyon pagaubanan sa presensya ni Arsobispo Ricardo Cardinal Vidal, Kongresista Eduardo Gullas sa unang distrito sa Sugbo ug Gobernador Gwendolyn Garcia.

Ang maong kalihukan usa ka paagi sa pagpaila sa siyudad sa Talisay ngadto sa mga turista ug usab usa ka paagi sa paghiusa sa probinsiya sa Sugbo isip usa ka "Festival Island."